تعذيب كليب
كتبهامحمد الشاعر ، في 4 أغسطس 2007 الساعة: 04:43 ص
مش عارف ايه الحكاية اليومين دول فى موضه اغتصاب الرجالة وخصوصا من رجال الشرطة وطبعا اكبر دليل على كلامى ده اغتصاب - امجد حسين - فى الطريق العام واغتصاب -عماد الكبير- فى محراب الامن… قسم الشرطة
والمصيبة كمان فى تصويرهم بالموبيلات يعنى اللى ما يشترى يتفرج… بيصورها مجانين ويتسابق على الفرجة عليها ناس اجن منهم
وكأن ظباط الشرطة دول مش مصريين متهيالى ولا حتى بنى ادمين كتلة من السادية مش اكتر
الله يرحم صلاح جاهين وكلامه اللى كله حكم لما قال
انا كل يوم اســـــــــــــمع … فلان عذبوه
اســـــــــــــرح فى بغداد والجزيرة واتوه
مااعجبش من اللى يطيق بجسمه العذاب
واعجب من اللى يطيق يعــــــذب اخوه
على العموم القصيدة ده بهديها الى امجد وعماد …. وربنا يستر عليا
فتوح
فتوح مهاود
طول عمره ساكت
فى قلبه كــــــــــــــانت احلام بسيطة
صغرت وصغرت وفى لحظة راحت
وفى كفة كــــــــــــانت زرعة امانى
كبرت وكبرت وفى لــــحظة شاخت
ـــــــــــــــــــــــــــــ
فى الصـــبح نازل ولشغلة رايح
شــــــــــايل همومه وشرز كالح
ماشى فى طريقة وبفكره سارح
و لاجيبه فيه غير قرش ماسح
وبرضه ساكت
ـــــــــــــــــــــــــــــ
قبض المرتب فــــــــــــــــــــى معاده جاى
فى جيبه لسته بزيت وسكر وخضار وشاى
مصـــــــــــــــــــاريف مدارس توت وناى
وعياله عــــايزة فراخ ولحمة طب وازاى
وبرضه ساكت
ـــــــــــــــــــــــــــــ
وفى ليلة راجع وكـان كمين
ظابط عساكر وكـــــام امين
خــــــــــدلوا شتيمة وشلوتين
نفد لانه بنطلونه بحزام متين
ولسه ساكت
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
أغسطس 5th, 2007 at 5 أغسطس 2007 9:19 م
الشعر بتاعك جميل اوى يا محمد ومعبر جدا
أغسطس 9th, 2007 at 9 أغسطس 2007 10:55 ص
رااائع يا محمد
ومازلت اكررها تذكرنى دوما بالشاعر فؤاد حداد
قصيدة موزونه وكلماتها تجبرك على مواصله قراءتها
سلمت يمينك
باقة ورد من نهى على
سبتمبر 1st, 2007 at 1 سبتمبر 2007 6:23 ص
انت موهبة بحق..ماشاء الله
ربنا يرفع الظلم عنا
سبتمبر 2nd, 2007 at 2 سبتمبر 2007 10:41 م
ممكن يكون السكوت هو الحل الوحيد للى احنا فيه
يعنى لو هنتكلم مين هيسمع ومين هيعمل
خلينا ساكتين احسن
ما اجمل كتاباتك واروعها
تحياتى